ЭКОЛОГИЯЛЫҚ АХУАЛ ЖАҚСАРАДЫ

15:36, 7 ақпан 2019

Теміртау қаласының экологиялық ахуалын жақсартуға 50 миллиард теңге қаржы бөлінеді. Ақшаның басым бөлігі металлургиялық комбинатта зиянды заттарды сүзгіден өткізетін заманауи қондырғылар орнатуға жұмсалмақ. Сондай-ақ құрышты қаланы көгалдандыру, қоғамдық көліктерді газға көшіру қолға алынады. Мемлекет басшысы да құрышты қаланың экологиялық ахуалын жақсарту жұмыстарын жүйелі түрде жүргізуді тапсырған болатын. 2018-2020 жылдарға арналған кешенді жоспарда тағы қандай шаралар қамтылған?

Теміртауға таралып жатқан зиянды қалдықтың 77 пайызы металлургиялық комбинаттан шығады. Алпауыт кәсіпорын жылына 200 мың тонна өндіріс қалдығын ауаға ұшырады. Бұл көрсеткішті азайту үшін 2012 жылдан бастап газ бен шаңды сүзгіден өткізетін бірнеше қондырғы орнатыпты.

Ғазиза БОТАНТАЕВА, №3 домна пешінің жұмысшысы:

-Газды тазартады, мына домна пешінің, содан кейін шаңды тазартады. Басында енді шаң көбірек болған. Себебі, пока мына қондырғылардың барлығын қойған кезде жиналып қалды ғой. Соның барлығын тазартып, қазір уже жаңағы жоғары көрсеткіштен көп төмендеді.

Шаң-тозаң металлургиялық комбинаттан шығатын өндіріс қалдығының тек 10 пайызын ғана құрайды, -дейді мамандар. Ал ауаға таралатын көмірқышқыл газы 50 пайыздан асады екен. Сондықтан бұл мәселе, көмірден бас тартып, жылу электр орталығының жұмысын газға көшіргенде ғана шешіледі, - деп отыр табиғат жанашырлары.     

Галина ДРОЗДОВА, Металлургиялық комбинаттың экология жөніндегі директоры:

-Қоршаған ортаға ең көп зиян келтіретін көмірқышқыл газы. Себебі қатты отыннан бөлінетін қалдық көп. «Сарыарқа» магистарльды газ құбырының құрылысы аяқталған кезде, комбинат мұндағы екі жылу электр орталығы көгілдір отынға көшеді деген үмітіміз бар. Сонда экологиялық жағдай да бірден жақсарар еді.

Құрышты қаланың экологиясын жақсарту үшін өткен жылы  кешенді жоспар қабылданған. Онда 77 экологиялық шара қамтылса, қазір соның 24-і жүзеге асыпты. Шамамен 50 миллиард теңге қаржы бөлініп отыр.   Биыл экологтар қаланы абаттандыру жұмыстарына да бел шешіп кіріспек. Теміртауда 42 мың түп ағаш көшеттері отырғызылады. Сондай-ақ, жолаушыларды тасымалдайтын 200 автобус  газға көшпек. Ол үшін 1 миллиард теңге қаржы бөлінген.

Сейітқали ӘШІМ

Тегтер: Қарағанды жаңалықтары мен оқиғалары, Қарағанды облысының соңғы жаңалықтары, Қарағандыдағы жаңалықтар

Тақырып бойынша материалдар

Танымал жаңалықтар